Сэтгэлийн зул

Дорноговь аймгийн Сайхандулаан сумын уугуул, Монгол Улсын Манлай уяач Чойжмаагийн Цэрэндэжид 2014 оны 12 дугаар сарын 7-нд бурхны оронд одлоо. Тэрээр 1932 онд Дорноговь аймгийн Сайхандулаан сумын нутаг Дэрсэн-Ус хэмээх газар төрж, бага насаа тэр үеийн багачуулын нэгэн адил малын захад өнгөрөөн,ажлын гараагаа авто тээврийн 32 дугаар баазаас эхэлж, тэтгэвэрт гартлаа жолоочоор ажиллан, Хошой аварга тээвэрчин болж байсан юм.
Ийнхүү моторт хүлэг жолоодон салхи татуулан давхиж явсан тэрээр өндөр насны тэтгэвэрт гарснаасаа хойш Говьсүмбэр аймгийн Сүмбэр суманд суурьшин мал маллахын зэрэгцээ хурдан хүлгийн уяа сойлгыг тааруулах их үйлст шамдан суралцах болжээ.
Ч.Цэрэндэжид 1980 онд Сүмбэр сумынхаа баяр наадамд ногоон даагаа түрүүлгэн амжилтын гараагаа эхэлсэн бөгөөд 30 гаруй жилийн хугацаанд улс, бүсийн наадмаас дөрвөн түрүү, зургаан айраг хүртэн 2000 онд Монгол Улсын Алдарт уяач, 2006 онд Оны шилдэг ахмад уяач,  2012 онд Монгол Улсын Манлай уяач хэмээх эрхэм цолны эзэн болсон юм. Түүнчлэн түүний  хөдөлмөр зүтгэлийг төр засгаас үнэлж 2012 онд Алтангадас одонгоор шагнаж байсан билээ.
Морь уях төрийн их хэрэгт шимтэн Монгол түмнээ цэнгүүлэх үйлсэд хүчин зүтгэж явсан  Манлай уяачийн хичээл, зүтгэл, гэгээн дүрийг  моринд хайртай Монгол түмэн үеийн үед дурсаж байх болно. Та минь амгалан нойрс доо.
Ум сайн амгалан болтугай.
“Тод магнай” сэтгүүлийн хамт олон